Актер соңғы 10 жылда 88 келі қосқанын мойындады.
Белгілі қазақстандық актер әрі кинопродюсер Рамазан Амантай соңғы 10 жыл ішінде 88 келі артық салмақ қосқанын мойындады. Ол бұл туралы Instagram желісінде арнайы видео жариялап, таразыға түскен сәтін көрсетті.
Актердің салмағы бүгінде 158,5 келіге жеткен.
Рамазан Амантай видео барысында жанкүйерлеріне шынайы үндеу жасады:
«158,5 кг... Болды, тоқтау керек. „Осы бала ауырмай ма?“ деп сіздер де уайымдап кеттіңіздер. Ауырған ештеңем жоқ. Жай ғана өзімді жеңе алмай, еркелеп жүргенім болмаса... Өзімді-өзім қолға алатын уақыт келді. Ата-анам да, жақындарым да уайымдай бастады. Бастау керек», – деді актер.
Актер осыдан 10 жыл бұрын түскен «Бизнес по-казахски» фильміндегі суретін жариялап, ол кезбен қазіргі салмағын салыстырды. Оның айтуынша, араға уақыт салып, шамамен 88 келі салмақ қосқан.
Әлеуметтік желідегі жазбасында актер жанкүйерлерін өзіне куә болуға шақырды:
«Ештеңе етпейді, талай қиындықты жеңіп жүрміз. Алланың қалауымен мұны да жеңеміз. Сіздердің көз алдарыңызда семірдім, енді көз алдарыңызда арықтаймын. Бұл сәтті өздеріңіз де күтіп жүрген шығарсыздар», – деді ол.
Актердің жазбасына жүздеген жанкүйер қолдау білдіріп, оның шешімін құптап, сәттілік тіледі.
