Айсәуле Бақытбек жеке өмірі жайлы ашық айтты.
Қазақстандық блогер және сұхбат жүргізуші Айсәуле Бақытбек әлеуметтік желідегі оқырмандарының көптен бері қызығушылығын тудырған сұраққа — «Ажырасқансыз ба?» — нақты жауап берді. Сонымен қатар ол не себепті балаларын желіге шығармайтынын түсіндірді.
Айсәуле — белгілі продюсер әрі актриса Баян Алагөзованың қызы. Ол Instagram парақшасында жиі “Сұрақ-жауап” айдарын өткізеді. Соңғы сұхбатында оқырмандарының бірі одан отбасы жағдайын сұраған.
Блогердің айтуынша, мұндай сұрақтарды негізінен жаңа жазылушылары қояды. Себебі оны бұрыннан танитындар Айсәуленің жеке өмірін ел назарына шығарудан аулақ екенін біледі.
«Мен парақшамда күйеуім мен балаларымды көрсетпеймін. Құдайға шүкір, бәрі жақсы», — деді Айсәуле.
Айсәуле Бақытбек балаларын көпшілікке көрсетпеу себебін де түсіндірді:
«Егер олар өскен соң өздері қаламаса ше? Ал ол уақытқа дейін жүздеген мың адам оларды көріп, түрлерін, талғамын, жетістіктері мен сәтсіздіктерін біліп қояды. Шынымды айтсам, ересек адамдардың өзге біреудің баласын көруге деген қызығушылығы мені аздап таңғалдырады», — деді блогер.
Айсәуле әлеуметтік желілерді балаларға арналмаған орта деп есептейді және оларға қатысты шектеулердің болуын қолдайтынын атап өтті.
