Атырауда өткен кезекті концертінде Төреғали Төреәлі күтпеген тосынсыйдың иесі атанды. Шара барысында әншіге жүргізуші куәлігінің үлкейтілген макеті табысталды.
Желіде тараған бейнежазбада сахнаға көтерілген ер адам Төреғалиге үлкен форматтағы куәлікті ұсынып, көрерменнің ықыласына бөленген сәт көрсетілген.
Бірнеше жыл бұрын әртіс есірткіге мас күйде көлік тізгіндегені үшін полицейлерге ұсталып, жүргізуші куәлігінен айырылған. Бұл оқиғаға қатысты деректерді сол кезде қалалық Полиция департаменті растаған.
Ресми мәліметте былай делінген:
«Жүргізушінің әрекеті күмәнді болды. Ол полиция талаптарына бағынбай, шамадан тыс агрессия танытты. Тұрақта тұрған Chevrolet көлігіне зақым келтіріп, оқиға орнынан қашуға әрекеттенген», – деп хабарлаған еді департамент.
