Қазақстандық шоу-бизнес өкілдері әнші Қайрат Нұртас пен актриса Жұлдыз Әбдукәрімованың Астанадағы жаңа шаңырағына арнайы бас сұқты. Бұл кездесу бірнеше қуанышты оқиғамен тұспа-тұс келді.
Жұлдызды отбасы бұл жолы жақын әріптестері мен достарын жаңа үйдің қоныс тойына, қыздары Рәбия Сұлтанның дүниеге келуіне және Қайрат Нұртастың 37 жасқа толуына орай шақырған.
Осылайша бір кеште үш бірдей маңызды мереке аталып өтті.
Кештен жарияланған стористер мен видеоларда отандық танымал тұлғалардың арасында актриса Айгүл Иманбаева, тележүргізуші Ләйлә Сұлтанқызы, сондай-ақ қазақстандық эстрада мен медиа саласының өзге де өкілдері көрінеді.
Айгүл Иманбаева әлеуметтік желідегі жазбасында жас отбасыға ақ тілегін білдіріп, жаңа қоныс пен сәбидің өмірге келуін, сондай-ақ Қайраттың туған күнін құттықтағанын атап өтті. Ол бұл кездесудің көптен күткен жүздесу болғанын да ишаралады.
Ал Ләйлә Сұлтанқызы Қайрат Нұртас қатысқан әсерлі видеоны бөлісіп, кештің шырайын кіргізген сәттерді көрсетті. Кадрларда мерейтой иесі қонақтардың назарында болғаны байқалады.
Желіде тараған кадрлардан кейін оқырмандар түрлі пікір қалдырған. Көпшілігі Қайраттың жайдары көңіл күйін атап өтіп, отбасылық өмірдің адамға оң әсер ететінін жазған.
