Магомед Адиев РПЛ клубының тізгінін ұстады.
Футболдан Қазақстан ұлттық құрамасының бұрынғы бас бапкері және қарағандылық "Шахтер" клубын жаттықтырған Магомед Адиев ресейлік "Химки" клубын басқарды.
47 жастағы ресейлік маман Қазақстан футболына 2021 жылдың сәуірінен бастап таныс. Ол алғашында "Шахтерде" бір жылдай жұмыс істеп, артынша екі жыл ұлттық құраманың тізгінін ұстады. Оның жетекшілігімен Қазақстан құрамасы бірнеше сенсациялық жеңістерге қол жеткізді.
Адиевтің бапкерлік мансабында Ресей клубтары да бар: "Ахмат", "Чайка", "Анжи" және "Легион-Динамо". Енді ол РПЛ-дегі "Химки" клубында жаңа тарау бастайды.
Соңғы ойында "Химки" өз алаңында "Крылья Советовтан" 1:3 есебімен жеңіліп қалды. Бұл матчта команда бірінші болып есеп ашқанымен, артынша үш гол жіберіп алды. Қазір "Химки" турнир кестесінде 12-орында тұр. Олар плей-офф аймағынан тек қосымша көрсеткіштер арқылы ғана жоғары орналасқан.
"Химкидің" алдағы ойыны 20 сәуір, жексенбі күні өтеді. Қарсылас — Санкт-Петербургтің "Зениті". Бұл ойын сырт алаңда болады. Сондықтан Адиев үшін бұл алғашқы үлкен сынақ болмақ.
