МЛС лигасындағы "Филадельфия" – "Интер Майами" кездесуі жанкүйерлерге голға бай нағыз шоу сыйлады. Бірақ матч соңындағы Мессидің шеберлігі барлық назарды өзіне аударды.
Бүгін таңертең АҚШ-тың Пенсильвания штатындағы Честер қаласында MLS аясындағы маңызды матч өтті. "Филадельфия Юнион" өз алаңында "Интер Майамиді" қабылдап, 3:3 есебімен тарқасты.
Кездесудің небәрі 7-минутында Қуинн Салливан есеп ашты. Америкалық жартылай қорғаушыға нәтижелі пас ұсынған – неміс қорғаушысы Кай Вагнер. Ал тайм соңында Тай Барибо өз есімін таблода тіркеді.
60-минутта "Интер Майамидің" аргентиналық шабуылшысы Тадео Алленде бір голмен жауап қатты. Бірақ 73-минутта Барибо қайта гол соғып, дубль жасады – есеп 3:1.
Матчтың 87-минутында Лионель Месси алыстан соққан әдемі голымен интрига қайтарды. Ал ойынға қосымша берілген уақытта Теласко Сеговия таразы басын теңестірді. Венесуэлалық жартылай қорғаушы алаңға қосалқы құрамнан шығып, Мессиден пас алған соң есепті 3:3 қылды.
Команданың басқа танымал футболшылары – Луис Суарес, Жорди Альба және Серхио Бускетс 90 минут бойы алаңда болды. Бірақ бұл үштіктен нақты нәтижелі әрекет байқалмады.
"Интер Майами" қатарынан төртінші ойында жеңіске жете алмай отыр. Соңғы алты матчтың бірінде ғана жеңіске жеткен Хавьер Маскераноның командасы 23 ұпаймен Шығыс конференциясының 6-орнында тұр. Ал "Филадельфия" 30 ұпаймен көш бастап келеді.
