Ташкентте "Манчестер Сити" және Өзбекстан құрамасының жас қорғаушысы Абдукодир Хусановтың үйлену тойының екінші күні өтті.
Әлеуметтік желілерде тараған бейнематериалдар мен суреттерде салтанатты шараның сән-салтанатпен өткенін байқауға болады. Тойда жергілікті танымал тұлғалар мен қымбат автокөліктер көзге түскен.
Футболшының жанкүйерлері мен медиа өкілдерін ең көп қызықтырған сұрақ — оның жұбайы кім? Әзірге бұл сұрақтың нақты жауабы жоқ. Желіде тараған видеоларда Хусановтың қалыңдығы ақ фатамен толықтай жабылған күйі көрінеді. Бет-жүзін көрсетуге рұқсат берілмеген. Бұл өзбек дәстүрі мен құпиялылыққа негізделген шешім болуы мүмкін.
Жанкүйерлердің тағы бір назар аударған жайт — тойға ағылшын клубындағы командаластары мен бас бапкер Хосеп Гвардиоланың келмеуі. Қонақтар қатарынан тек жергілікті жұлдыздарды байқауға болады.
Абдукодир Хусанов АПЛ аясында алты матчқа қатысып, бір мәрте сары қағаз алған. Бұл оның Еуропаға енді аяқ басып келе жатқан жас қорғаушы екенін көрсетеді. Бірақ жеке өміріндегі жаңалық оның спорттық мансабына жаңа серпін беруі мүмкін.
