Қазақстан футбол құрамасының Беларуське қарсы жолдастық матчы ресми түрде басқа стадионға ауыстырылды. Бұл туралы Беларусь футбол федерациясы (БФФ) хабарлады.
Алғашында матч Минск қаласындағы Ұлттық Олимпиадалық стадион "Динамо" аренасында өтеді деп жоспарланған болатын. Алайда мамандардың мәліметінше, 24–25 мамыр күндері алаңда өткен жаппай іс-шаралардан кейін негізгі ойын алаңы қатты зақымданып, қалпына келтіру жұмыстарына кемінде екі апта уақыт қажет.
Сол себепті Беларусь – Қазақстан матчын Борисов қаласындағы "Борисов-Арена" стадионына көшіру туралы шешім қабылданды. Бұл өзгеріс УЕФА мен Қазақстан футбол федерациясының келісімімен жүзеге асқан.
Жолдастық кездесу 5 маусым күні өтеді. Матч Қазақстан уақытымен сағат 22:00-де басталады. Жанкүйерлер енді командалар арасындағы тартысты ойынды Борисов қаласында тамашалай алады.
