Португалия құрамасы мен "Әл-Наср" шабуылшысы Криштиану Роналду жаңа форматтағы клубтық әлем чемпионатына қатысуға жақын.
Marca мәліметінше, Роналдуға турнирге қатысатын бірнеше клубтан ресми ұсыныс түскен. Бұған дейін 40 жастағы футболшының "Әл-Наср" клубынан кететіні жөнінде ақпарат тараған. Дегенмен қазіргі жағдай оның әлемдік деңгейдегі жарыста ойнау мүмкіндігін жоққа шығармайды.
Турнирде алты конфедерациядан 32 команда бақ сынайды. Олар сегіз топқа бөлініп, әр топтан екі үздік ұжым плей-офф кезеңіне жолдама алады.
Финалдық кездесу 2025 жылдың 13 шілдесінде АҚШ-тың Нью-Джерси штатындағы "МетЛайф" стадионында өтеді. Жүлде қоры 1 миллиард АҚШ долларынан асады, бұл клубтық турнирлер тарихындағы ең ірі сомалардың бірі болмақ.
