Бар мәселе ақшада болып шықты.
Өзбекстандық қорғаушы Абдукодир Хусановтың «Манчестер Сити» сапындағы ойынына қатысты қызықты мәлімет жария болды. Ағылшын клубы ойыншының маусымдағы матчтар санына шектеу қойып, келісімшарттағы қаржылық міндеттемеден құтылуға тырысқан болып шықты. Бұл туралы xaylight инстаграм-парақшасы хабарлады.
«Сити» мен Францияның «Ланс» клубы арасындағы келісімшартта мынадай опция болған: егер Хусанов 2024/25 жылғы маусымда 10 матчқа қатысса, ағылшын клубы қосымша 5 миллион еуро төлеуге міндеттелген.
Осыған байланысты Хусанов тек 9 матчқа ғана қатысып, 10-шы кездесуге шықпады. Сарапшылардың пікірінше, «Манчестер Сити» осылайша қосымша бонус төлеуден жалтарған.
Бұл — футболда жиі кездесетін тәжірибе: клубтар қаржылық шығынды азайту үшін келісімшарттағы осындай тетіктерді жиі қолданады.
