Дастан Сәтпаев әлемге әйгілі Nike брендімен келісімшартқа отырып, қазақ футболында тарихи жетістікке қол жеткізді.
Қазақстан ұлттық құрамасының жас шабуылшысы және «Қайрат» клубының ойыншысы Дастан Сәтпаев әлемдік спорттық бренд Nike компаниясымен ресми келісімшартқа отырды. Бұл — отандық футбол тарихындағы ерекше әрі алғашқы оқиға. Бұл туралы Aladop.kz хабарлады.
Nike-пен келісімге қол жеткізген Сәтпаев — Қазақстанда кәсіби деңгейде әлемдік спорт брендімен жеке келісімшарт жасасқан алғашқы футболшы. Бұған дейін мұндай мәртебеге елімізден ешбір кәсіби ойыншы қол жеткізбеген. Бұл серіктестік — тек жас ойыншы үшін емес, жалпы қазақстандық футбол үшін үлкен жетістік ретінде бағаланып отыр.
2025 жылғы маусымда Қазақстан премьер-лигасында Сәтпаев 12 матч өткізіп, 8 гол соғып, 3 нәтижелі пас берді. Жас шабуылшының алаңдағы жарқын ойыны оған ұлттық құрамаға жол ашты. ӘЧ-2026 іріктеу кезеңінде ол Уэльс пен Лихтенштейнге қарсы кездесулерде Қазақстан намысын қорғады.
Футбол сарапшылары бұл келісімді қазақстандық футболдың жаһандық танымалдылыққа жақындауы ретінде бағалап отыр. Nike секілді алпауыт компанияның назарын аударту — талантты футболшының әлеуетін ғана емес, ел футболының даму қарқынын да көрсетеді.
