Өзбекстан футбол қауымдастығы әлем чемпионатының іріктеу кезеңіндегі шешуші матч – БАӘ құрамасына қарсы ойын (0:0) алдында түсірілген эмоционалды бейнероликті жариялады.
Матч алдындағы киім ауыстыратын бөлмеде команда капитаны Жалолиддин Машарипов пен бас бапкер Тимур Кападзе жігіттерге жігерлі үндеу жасады.
"Бұған дейін біз әрдайым айттық – Отан үшін, ата-ана үшін, халық үшін, Өзбекстан үшін. Бүгін осы сөздер іске асуы тиіс. Біз бір-бірімізді соңғы 3-4 жылда отбасымыздан да жиі көріп жүрміз. Бүгін біз отбасы екенімізді дәлелдейік! 90 минуттан кейін басымызды төмен түсірмеуіміз керек. Бұл – Өзбекстан халқы үшін мереке болуы тиіс. Бүгінгі күн – тарихқа енетін күн", – деді Машарипов.
Кападзе: "Сіздер – өзбексіздер. Осыны ұмытпаңыздар!"
"Біз кімнің ұрпағы екенімізді білесіздер ме? Ұмытпаңыздар. Қарсылас кім болса да – сіздер өзбексіздер. Мақтанышпен алаңға шығып, күресіңіздер. Тарихты бүгін жазыңыздар! Сәттілік тілеймін, жігіттер!" – деді Тимур Кападзе.
5 маусым күні Абу-Дабидегі "Аль-Нахайян" стадионында өткен матч 0:0 есебімен аяқталды. Бұл нәтиже Өзбекстан құрамасына құнды бір ұпай әкелді. Команда 18 ұпай жинап, топтық кезеңнің аяқталуына бір тур қалғанда А тобындағы ең кемі екінші орынды иеленіп, ӘЧ-2026 додасына жолдама алды.
Ал 10 маусым күні Өзбекстан құрамасы Катарды 3:0 есебімен жеңді. Бұл матч іріктеу турниріндегі қорытынды кездесу болды. Қосымша міндеттер жүктелмегеніне қарамастан команда сенімді ойын көрсетіп, турнирді жеңіспен аяқтады.
