Мюнхеннің «Бавариясы» шабуылшы Николас Джексонды қатарға қосуға бір қадам жақындады. BILD журналисі Кристиан Фальктің хабарлауынша, неміс клубы 24 жастағы сенегалдық футболшымен жеке келісім бойынша принципті шешімге келген.
Енді тараптарға трансфердің нақты шарттарын талқылау қажет. «Бавария» ойыншыны алдымен арендаға алуды қаласа, «Челси» толыққанды сатылымды көздеп отыр. Лондондық клуб бастапқыда £80 миллионға бағаланған форвардтың құнын төмендетуге дайын екені айтылады, бұл оның кету процесін жеделдетуі мүмкін.
Николас Джексон 2023 жылы «Вильярреалдан» «Челсиге» ауысқан еді. Өткен маусымда ол Премьер-лигада 34 матч өткізіп, 13 гол соғып, 5 нәтижелі пас берді. Дегенмен, жаңа бас бапкер Энцо Мареска оның болашақтағы жоспарына сәйкес келмейтінін анық көрсеткен. Маусымның алғашқы екі турында сенегалдық футболшы алаңға шықпады.
Егер «Бавария» мен «Челси» ортақ мәмілеге келсе, Джексон Бундеслигада жаңа мүмкіндік алып, мюнхендік клубтың шабуылын күшейте алады. Ал «Челси» өз кезегінде құрамды қайта құру саясатын жалғастырып, қажет қаржыны босатпақ.
