Алматының "Қайрат" клубы УЕФА Чемпиондар лигасында шотландиялық "Селтикті" сенсациялық түрде жеңіп, топтық кезеңге жолдама алды. Бұл — қазақстандық футбол тарихындағы айтулы оқиға.
"Қайрат" ФК бақылау кеңесінің төрағасы Қайрат Боранбаев әлеуметтік желіде тарихи жетістікке қатысты пікір білдірді:
"Біз мұны жасадық. Жылдар бойы еңбектеніп, дәл осы сәтке жетуді мақсат еттік. Қазақстан футболының да Чемпиондар лигасының әнұраны шырқалатын деңгейге көтеріле алатынын дәлелдедік. Біздің команда мұндай ауқымдағы ойындарда сабырмен, мінезбен, абыроймен ойнап, жеңіске жете алатынын көрсетті.
Академиядағы жүйелі жұмыс, инфрақұрылымға салынған қаржы, өз тәрбиеленушілерімізге қолдау — бәрі ұзақмерзімді нәтиже берді. Шетелден дайын шешім іздеудің қажеті жоқ: елде өз командаңды, өз футбол мектебіңді қалыптастыруға болады.
Бұл — күн сайын аянбай еңбек еткен жүздеген жанның еңбегі: бапкерлердің, дәрігерлердің, талдаушылардың, тәрбиешілердің, ойыншылардың. Бұл жолда сенім де, күш те, арман да бар. Біз мұны жанкүйерлер үшін жасадық. Қала үшін. Еліміз үшін. Себебі Қазақстанның футболдық әлеуеті бар. Алматыға еуропалық алпауыт клубтардың келуі үшін. Біздің балалардың өз арманы болуы үшін. Қазақстанда мақтан тұтатын команда бар екенін дәлелдеу үшін".
Бұл жеңіс ел футболының жаңа белесі ретінде тарихта қалады. Алматыдағы жас жанкүйерлер үшін бұл — армандардың орындалатынын дәлелдейтін үлкен шабыт. Енді Қазақстан клубтары да еуропалық деңгейде ойнап, өз мәдениетін қалыптастыра алатынын көрсетті.
