Кеше Чемпиондар лигасының негізгі кезеңіне арналған жеребе тарту рәсімі өтті. Нәтижесінде қазақстандық "Қайраттың" қарсыластарының бірі әйгілі "Реал Мадрид" болды.
Испаниядағы жетекші басылымдар мадридтіктердің Қазақстанға сапарын “шынайы тозақ” деп атады.
OKDiario: “Реалды” 6 430 шақырымдық жол күтіп тұр. Алматы Мадридтен Нью-Йорктен де алыс. Бұл сапардан біз ұта қоямыз деп айту қиын, бірақ көп нәрсені жоғалтуымыз мүмкін”. Басылым Алматыдағы қысқы суықты (-10 °C) және жанкүйерлер үшін қиын логистиканы атап өтті.
Infobae: “Қайраттың” Чемпиондар лигасындағы алғашқы дебюті – маусымның басты сенсациясы. Клуб Мадридтен 8 000 шақырым қашықтықта орналасқан”. Басылым “Селтикті” пенальти сериясында жеңіп шыққан Темірлан Анарбековтың ерлігін ерекше атады.
AS: “Қайраттың” киім ауыстыру бөлмесінде “Реалдың” атауы шыққанда нағыз мереке болды». Газета бұл матчты клуб тарихындағы ең маңызды кездесулердің бірі ретінде сипаттады.
TyC Sports: “Қайрат” – Чемпиондар лигасының басты тосынсыйы. “Селтикті” жолдан тайдырған команда енді “Реалға” қарсылас атанды. Алматыдағы Орталық стадион Қытай шекарасынан бар болғаны 350 шақырым жерде орналасқан”.
The Objective: “Қайрат” – Қазақстан футболының алыбы. Клуб 1954 жылы құрылған, ел чемпионатын бес рет, Кубокты он рет жеңіп алды. Қазір алғаш рет негізгі кезеңге жолдама алды”. Басылым “Челсиден” жалға алынған 17 жастағы Дастан Сәтпаевты басты үміт ретінде көрсетті.
El Español: “Мадридтіктер Қазақстанға 8 000 шақырым ұшады. Бұл – турнир тарихындағы ең алыс сапар. -15 °C-қа дейін түсетін суық пен уақыт айырмасы “Реалға” үлкен сынақ болмақ». Клубтың өкілі Эмилио Бутрагеньо: “Бұл өте алыс, жолды және қарбалас кестені ескеруіміз қажет”, – деп мәлімдеді.
1954 жылы құрылған “Қайрат” – Қазақстан футболының тарихындағы ең дәстүрлі клуб. Ол Кеңес Одағының жоғарғы лигасында 24 маусым ойнаған, бұл – Орталық Азия үшін рекорд.
Биылғы маусымда алматылық команда тұңғыш рет Чемпиондар лигасының негізгі кезеңіне жолдама алып, Еуропаны таңғалдырды.
