Танымал қазақстандық блогер Артур Асқарұлы, көпшілікке «Archibaaalt» лақап атымен белгілі, Чемпиондар лигасының Алматыдағы ойындарына қатысты пікір білдірді. Ол өз мәлімдемесін «Қайрат» – «Пафос» матчы қарсаңында жариялап, жоғары билет бағасына байланысты туындаған дауға жауап берді.
Блогер Артур Асқарұлы «Қайрат» клубының үй матчтарында диктор қызметін атқарады. Сондықтан ол жағдайды ішінен жақсы білетін тұлға саналады.
Артур Асқарұлының айтуынша, Чемпиондар лигасындағы ойындарға билеттердің бағасы екі есе төмендетілген. Бұл туралы ол өзінің әлеуметтік желідегі парақшасында хабарлады.
«Чемпиондар лигасына билеттер сатылымға шықты және бұрынғыдан екі есе арзан! 21 қазанда Алматыда кезекті ЧЛ матчы өтеді — қарсыласымыз “Пафос”», – деп жазды блогер.
Оның жазбасы әлеуметтік желілерде кеңінен тарап, жанкүйерлер арасында қызу талқылауға себеп болды.
Бұған дейін «Қайраттың» Чемпиондар лигасындағы билеттерінің қымбаттығы қоғамда наразылық туғызған еді. Артур Аскарұлының мәлімдемесі клубтың жанкүйерлермен байланысын жұмсартуға бағытталған қадам ретінде бағаланып отыр.
Көптеген жанкүйерлер енді жаңа баға саясаты ойынға келушілер санын арттырады деген үмітте. Ал кей сарапшылар «Қайраттың» бұл шешімін клубтың әлеуметтік жауапкершілікті сезінуімен байланыстырады.
