Қазақстан ұлттық құрамасы ӘЧ-2026 жылғы іріктеу кезеңіндегі кезекті ойынын Солтүстік Македонияға қарсы өткізді. Скопьедегі матч 1:1 есебімен аяқталды.
Қазақстан алғашқы минуттардан-ақ шабуылға негізделген футбол көрсетті. Тіпті үзіліске дейін-ақ есеп ашуға мүмкіндік алған еді. Ислам Чесноков бір метр қашықтықтан бос қақпаға тигізе алмады. Ғалымжан Кенжебек пен Иван Свиридовтың да тамаша сәттері болды. Бағдат Қайыров алыстан соққы жасап, доп бағанның қасынан өтті.
Өз кезегінде алаң иелерінің шабуылдарын Мұхамеджан Сейсен сенімді түрде тойтарды. Екінші таймда македониялықтар қысымды күшейткенімен Дінмұхамед Қараманның әдемі соққысынан кейін доп өз қақпаларында тулады. Дегенмен Македония Энис Барди орындаған айып соққысынан кейін есепті теңестірді.
Жеті тур қорытындысы бойынша Қазақстан құрамасы 7 ұпаймен «J» тобының төртінші сатысында орналасқан.
Солтүстік Македония 13 ұпаймен екінші орынға сырғыды. Ал Бельгия 14 ұпай жинап, көш бастап келеді.
Талғат Байсұфиновтың шәкірттері 15 қарашада Астанада Бельгия құрамасын қабылдайды.
