Жоба балалар мен жасөспірімдер футболын дамытуға және өңірлік спорт инфрақұрылымын жақсартуға бағытталған.
Ақтөбе облысының Хромтау қаласында FIFA Arena бағдарламасы шеңберінде салынған жаңа футбол алаңының ашылу салтанаты өтті.
Бұл жоба — FIFA мен Қазақстан футбол федерациясының (ҚФФ) бірлескен бастамасы. Оның басты мақсаты — балаларға қолжетімді әрі қауіпсіз спорт алаңдарын көбейту, жасөспірімдердің футболға қызығушылығын арттыру.
Қазақстан футбол федерациясының бас хатшысы Давид Лория өз сөзінде Мемлекет басшысының бұқаралық спорт пен балалар инфрақұрылымын дамыту туралы тапсырмасын еске салып, бұл жобаның ұлттық деңгейдегі мәні зор екенін айтты:
«Мемлекет басшысы өз Жолдауында бұқаралық спортты дамыту міндетін қойған болатын. FIFA қолдауымен ашылған бұл екінші алаң – сол мақсаттың нақты нәтижесі. Сенемін, бұл жер барлық оқушылардың сүйікті орнына айналып, футболға деген қызығушылықтарын арттырады», – деді Лория.
FIFA Arena бағдарламасы — Қазақстан футбол федерациясының стратегиялық жобаларының бірі. Ол балалар мен жасөспірімдер футболына арналған заманауи, қауіпсіз және қолжетімді инфрақұрылым қалыптастыруға бағытталған.
