Жас жұлдыз жуырда ғана Чемпиондар лигасы жалпы кезеңінің бесінші турында «Копенгагенге» қарсы матчта (2:3) 17 жастағы шабуылшы гол соғып, көзге түскен еді.
Қазақстан құрамасы мен «Қайраттың» жас шабуылшысы Дастан Сәтпаев соңғы үш айдағы қарқынды дамуының сырын бөлісті. 17 жастағы футболшының сөзіне қарағанда, оның жетістігінің кілті — үлкен матчтардағы тәжірибе мен үздіксіз үйрену процесі.
«Әрине, өстім. Себебі мен мықты командалармен ойнап жүрмін. Әр қарсылас өздігінше күшті, әр ойында жаңа дағдыларға үйренесің, жаңа тәжірибе жинайсың. Сол арқылы мен өз ойынымды жаңа деңгейге көтеріп жатырмын», — деді Сәтпаев.
Чемпиондар лигасы жалпы кезеңінің бесінші турында «Копенгагенге» қарсы матчта (2:3) 17 жастағы шабуылшы қақпашының қателігін пайдаланып, 81-минутта гол соқты.
Осылайша, Сәтпаев Чемпиондар лигасы тарихында гол соққан алғашқы қазақстандық атанды, және турнир тарихындағы ең жас үш бомбардирдің қатарына қосылды.
Бұған дейін ол Қазақстан құрамасы сапында Бельгия қақпасына (1:1) алғашқы голын соғып, ұлттық команданың тарихындағы ең жас гол соққан ойыншы атанған еді.
Айта кетейік, 2025 жылғы маусым қорытындысы бойынша Дастан Сәтпаев ҚПЛ-дің үздік бомбардирлерінің қатарына енді.
