Миллиондаған бонус! «Ордабасының» легионерге төлеген сома әшкере болды

«Ордабасы» клубы мен Кабо-Верде футболшысы Жоао Паулиньо арасындағы келісімшарт әшкере болды. ASnews.kz таратқан ақпарға сәйкес, бұл құжатта ойыншының ай сайынғы жалақысынан бөлек, берілген бонустар сомасы да көрсетілген.

Келісімшарт 2025 жылдың 1 шілдесінде рәсімделген. Ол ағылшын және орыс тілінде, екі тараптың қолымен бекітілген. Яғни клуб президенті Асхат Сейсембек пен ойыншы Жоао Паулиньо қол қойған.

Ағылшын тіліндегі нұсқада «Ордабасы» басшысы ретінде бұрынғы жетекші Бауыржан Абдубаитовтың есімі көрсетілген. 

Жалақы мен бонустар

Әлеуметтік желіде жария болған мәлімет бойынша, Паулиньоның клубпен келісімі мынадай: 

Айлық жалақы:

• 5 422 222 теңге (салыққа дейін)
• 4 880 000 теңге (салықтан кейін)

Пайдаланылмаған демалыс үшін өтемақы:

• 16 733 333 теңге (салыққа дейін)
• 15 060 000 теңге (салықтан кейін)

Бұл соманы клуб 31 тамызға дейін төлеуі тиіс болған.

Естеріңізге сала кетейік, жуырда ғана «Ордабасы» шабуылшысы Жоао Паулиньоның агенті Педро Морейраның БАҚ беттерінде даулы сұхбаты шықты. Онда шымкенттік клуб өкілдері атап айтқанда техникалық директор Музаффар Абдулсатаров пен президент Асхат Сейсембектің ойыншыдан ақша өндіргісі келгенін айтып, жанкүйерлерді дүрліктірген еді.