Ағылшындық басылымдар «Ливерпульдің» бұрынғы бас бапкері Юрген Клопп командаға қайта оралуы мүмкін екені туралы жазуда. Клуб қожайындары неміс маманын қазіргі жаттықтырушы Арне Слот қызметінен кеткен жағдайда маусым соңына дейін команда тізгінін қайта ұстауға шақыруы ықтимал.
Британдық The Sun жазған мәліметке сәйкес, клуб басшылығы Клоппқа маусымның соңына дейін бас бапкер қызметін атқару туралы ұсыныс жасауды жоспарлап отыр деген ақпарат бар.
Юрген Клопп «Ливерпульді» 2015 жылдың қазанынан 2024 жылдың маусымына дейін басқарды. Оның орнына осы маусым алдында нидерландтық маман Арне Слот келген еді.
Клопптың қайта шақырылу мүмкіндігі – клуб басшылығының қазіргі жағдайға қанағаттанбай отырғанын көрсететін ишара ретінде қарастырылып отыр.
Бір қызығы, Арне Слоттың бастамасымен «Ливерпуль» 2024/2025 маусымында Англия Премьер-лигасының чемпионы атанған болатын. Дегенмен жаңа маусымдағы нәтиже сын көтермей тұр. Қазіргі маусымда «қызылдар» барлық турнирлерді қоса есептегенде тоғыз рет жеңіліп, осы аптада Чемпиондар лигасында ПСВ-дан 1:4 есебімен ұтылып қалды.
Осындай сәтсіздіктерден кейін Слоттың болашағы туралы сыбыстар күшейіп, Клопптың аты тағы да «Энфилдпен» қатар атала бастады.
Юрген Клопптың есімі «Ливерпуль» жанкүйерлерінің жадында мәңгі қалды деуге болады. Оның кезеңінде клуб Чемпиондар лигасын, Англия Премьер-лигасын, Еуропа және әлемдік деңгейдегі бірқатар атақты трофейлерді жеңіп алды.
Сол себепті Клопптың тіпті уақытша болса да клубқа оралуы туралы кез келген қауесет жанкүйерлер арасында үлкен резонанс тудырады.
