Өзбекстан құрамасы тарихында алғаш рет футболдан әлем чемпионатының финалдық кезеңіне шығып, 2026 жылғы мундиальда Португалия және Колумбияға қарсы ойнайды.
Өзбекстан құрамасының бас бапкері, әлем футболының жұлдызы Фабио Каннаваро 2026 жылғы әлем чемпионатының жеребесіне өз бағасын берді. Италиялық маман 2025 жылдың қазан айынан бері Өзбекстан құрамасын жаттықтырып келеді.
Италия футболының аңызы жеребенің нәтижесін сабырмен қабылдап, ойыншыларға үлкен мүмкіндік ретінде қарастыратынын айтты.
«Бұл – әлем чемпионаты, демек бізге түскен кез келген қарсыласпен ойнауға дайын болуымыз керек. Бізді Португалия және Колумбия сияқты құрамалармен ойындар күтіп тұр, ал бұл біздің жігіттер үшін үлкен мотивация. Біз әлем чемпионатына қатысып отырмыз, жеребе қалай түсті – солай қабылдаймыз. Мұнда болғанымызға өте қуаныштымыз», – деп Каннавароның сөзін A Bola басылымы келтіреді.
Өзбекстан құрамасы 2026 жылғы әлем чемпионатында К тобына түсті. Бұл квартетте қазір мыналар бар:
Топтағы төртінші қатысушы ДР Конго және Ямайка / Жаңа Каледония құрамалары арасындағы құрлықаралық плей-офф нәтижесінде белгілі болады. Шешуші ойындар 2026 жылдың наурыз айында өтеді.
ӘЧ ашылу ойыны да белгілі болды. Турнирді Мексика және Оңтүстік Африка Республикасы (ОАР) құрамалары бастайды. Кездесу 11 маусым күні Мехикодағы әйгілі «Ацтека» стадионында өтеді. Бұл арена 83 мыңнан астам жанкүйерді сыйдыра алады.
