"Челсиде" жарқыраған футболшы Қазақстанда ойнамақ

Лондондық "Челси" клубының бұрынғы ойыншысы, 35 жастағы Виктор Мозес Қазақстан Премьер-Лигасында өнер көрсетеді, деп хабарлайды AmanVIBE.

"Мендегі ақпаратқа сүйенсек, нигериялық футболшы қызылордалық „Қайсармен“ бір жылдық келісімшартқа қол қояды".

Нигериялық ойыншының Ағылшын Премьер-лигасында біраз жылдар өнер көрсеткені де айтылды:

"Мозес мансабын „Кристал Пэласта“ бастап, кейін „Уиган Атлетикке“ ауысты, сол жерде оның ойыны „Челсидің“ назарын аудартты. Мансабындағы ең табысты кезең 2016/17 маусымына тұспа-тұс келді: ол Антонио Конте баптаған „Челсиде“ ойнап, командаға Премьер-Лиганы жеңіп алуға көмектесті. Сол маусымда ол көбіне қаптал қорғаушысы позициясында өнер көрсетті. Бұдан бөлек, Нигерия құрамасының экс-ойыншысы (38 матч, 12 гол) „Сток Сити“, „Вест Хэм“, „Фенербахче“, „Интер“, „Спартак“ (Мәскеу) және „Лутон Таун“ клубтарының да намысын қорғаған. Ойыншының ресми таныстырылымы 24 қаңтарда Қызылордада өтеді", — деп жазады дереккөз.

Еске салайық, өткен маусымда ҚПЛ-де қызылордалықтар турнирлік кестеде 11-орын алып, 22 ұпай жинады. "Қайсар" 2025 жылы жекешелендірілген алғашқы футбол клубы атанды. Команда жергілікті кәсіпкер Исламғали Қозбақовтың басқаруына өтті.