Павлодарда 20–25 мың көрерменге арналған еуропалық деңгейдегі жаңа футбол стадионын салу жоспарланып отыр.
Павлодар облысының әкімі Асаин Байханов өңірде жаңа заманауи футбол стадионы салынатынын мәлімдеді. Жоба жүзеге асса, жаңа арена жергілікті "Ертіс" клубының стадионы болады.
Әкімнің айтуынша, қазіргі уақытта стадион жобасының техникалық параметрлері әзірленіп жатыр. Алдын ала жоспар бойынша, жаңа спорт нысаны 20–25 мың көрерменге есептеледі.
"Біз үлкен футбол стадионын салуды жоспарлап отырмыз. Қазір жобалаушылар оның параметрлерін пысықтауда. Бұл еуропалық деңгейдегі заманауи арена болады. Қалалық әкімдік осы бағытта жұмыс жүргізіп жатыр, ал біз өз тарапымыздан қаржыландыруды қамтамасыз етеміз", – деді Асаин Байханов.
Өңір басшысы мұндай ірі инфрақұрылымдық жоба облыстағы спортты дамыту стратегиясының маңызды бөлігі екенін атап өтті.
Стадион құрылысы тек "Ертіс" клубының Премьер-лигаға оралуымен ғана байланысты емес, сонымен қатар аймақта футболды жаңа деңгейге көтеруге бағытталған.
Павлодарлық клуб өткен маусымда Бірінші лигада 61 ұпай жинап, турнир кестесінде екінші орын алды. Соның нәтижесінде команда бес жылдан кейін Қазақстан Премьер-лигасына қайта оралды.
Қазіргі таңда клуб өз матчтарын 11 828 орындық "Орталық" стадионда өткізеді.
