100 млн теңге: ҚФФ неге қарызға батты

Қазақстан футбол федерациясының медиасеріктесі федерация тарапынан қарыздың бар екенін айтып, футзал матчтарының көрсетілімі тоқтатылғанын хабарлады. Бұл туралы BAS Pro компаниясының бас директоры Ақылбек Досжанов әлеуметтік желідегі парақшасында жазды деп хабарлайды Kursiv media.

"Ертең футзал трансляциясы болмайды. Федерация 5 ай бойы ақша төлемей келеді (100 миллионнан астам)… Біз Б. Сафин мен М. Омаровтан сұрап шаршадық. Сұрақтарыңыз болса, адал жауап беруге дайынмын", – деп жазды Досжанов.

Оның айтуынша, қарыздарға байланысты компания матчтарды көрсетуін тоқтатады. Наурыз айының соңында BAS Pro Қазақстан Премьер-лигасы матчтарының трансляциясын қаржыландыру қысқарғанын хабарлаған еді. 

Бұдан бөлек, жалақыға қатысты да мәселе жоқ емес. Оралда, сондай-ақ Атырау, Ақтау, Ақтөбе және басқа да қалаларда төлемдер шамамен бес ай бойы жүргізілмей келеді.

"Осы уақыт ішінде бірнеше рет уәде беріліп, кепілдік хаттар жолданғанымен, міндеттемелер әлі орындалған жоқ. Көпшілік үшін бұл – негізгі табыс көзі", – делінген үндеуде.

Үндеу авторлары жауапты тұлғалардан берешекті өтеудің нақты мерзімдерін жариялауды талап етті.