Қазақстанның бас хоккей клубы – "Барыс" жеке меншікке өтуі ықтимал. Ресейлік ірі компания клубты сатып алуға ниетті деген ақпарат тарады.
“Хайруллин Live” Telegram арнасына сілтеме жасап хабарлағандай, астаналық «Барыс» клубын 2 миллиард рубльге (шамамен 13,3 миллиард теңге) сатуы мүмкін деген мәселе жабық форматта талқыланып жатыр.
“Барысты” ірі ресейлік компания сатып алуы мүмкін деген әңгіме жүріп жатыр. Бағасы – 2 миллиард рубль. Бірақ бұл кімге керек?”, – делінген ресейлік ресурста.
2024/2025 жылғы Құрлықтық хоккей лигасының (КХЛ) қорытындысы бойынша “Барыс” Шығыс конференциясында маусымды 12-орынмен (яғни соңғы орынмен) аяқтады. Команда 68 матчтың 54-інде жеңіліп, небәрі 35 ұпай жинаған.
Айта кету керек, Қазақстанда мемлекеттік бюджеттен шетелдік спортшыларды қаржыландыруға тыйым салынған заң қабылданғаннан кейін “Барыс” барлық легионерлерімен қош айтысуға мәжбүр болды. Бұл жағдай команданың құрамын түбегейлі өзгертіп, нәтижесіне тікелей әсер етті.
