Қазақстан әлем чемпионатын жеңіспен бастады

Алғашқы ойындағы жеңіс

Польшаның Крыница қаласында өтіп жатқан IA дивизионындағы әлем чемпионатының алғашқы турында Максим Худяковтың шәкірттері Венгриямен кездесіп, 5:2 есебімен сенімді жеңіске жетті.

Бұл матчта Қазақстан құрамасының сапынан бірден бес ойыншы мергендігімен ерекшеленді. Атап айтқанда, қарсылас қақпасын:

• Егор Кравченко
• Илья Громов
• Кирилл Задорожный
• Михаил Коленко
• Жаһангер Тілеухан дәл көздеді.

Ал Венгрия құрамасы сапында Марк Остойич пен Доман Сонгот шайба соқты.

Келесі матч қашан өтеді?

Қазақстандық жасөспірімдер келесі ойынын 19 сәуір күні турнир қожайыны — Польшаға қарсы өткізеді. Кездесу Астана уақытымен 22:30-да басталады.

Айта кетейік, Қазақстанның жасөспірімдер құрамасы бұл турнирде әлем чемпионатының элиталық дивизионына берілетін жалғыз жолдама үшін күресіп жатыр. Сондықтан әрбір матчтың маңызы өте жоғары.