Қазақстан футзал құрамасы Хошиминде өткен екінші жолдастық кездесуде Вьетнам құрамасымен тең ойнады.
Бірінші таймда Ерсұлтан Сағындыков пен Нұрсұлтан Пиялы қарсылас қақпасына екі гол соғып, Қазақстан құрамасын алға шығарды. Үзілістен кейін қорғаныстағы қателіктер салдарынан біздің құрама екі гол жіберіп алды. Нәтижесінде матч 2:2 есебімен тең аяқталды.
Еске сала кетейік, бірінші жолдастық кездесуде Вьетнам құрамасы күтпеген жерден Қазақстаннан 4:1 есебімен басым түскен болатын. Бұл нәтиже жанкүйерлер мен мамандарды таңқалдырғаны рас.
Екі құрама арасындағы ФИФА рейтингіндегі айырмашылық едәуір. Қазақстан әлемдік рейтингте 7-орында тұр, ал Вьетнам 31-орында орналасқан.
Екінші матчта Қазақстанның негізгі ойыншылары қатарында бірнеше жас әрі тәжірибесі аз футзалшылардың болуы — командада жаңару процесі жүріп жатқанын көрсетеді. Бапкерлік штаб алдағы турнирлерге кең құраммен дайындалуға ниетті екені байқалады.
