Шахмат әлемінің жұлдызы, 16-шы әлем чемпионы Магнус Карлсен өз елінде өтіп жатқан Norway Chess турнирінде күтпеген сәтсіздікке ұшырады.
Үндістандық Гукеш Доммараджумен болған классикалық партияда жеңіске жететін позицияда тұрған норвегиялық гроссмейстер қателікке бой алдырып, қарсыласынан жеңіліп қалды. Бұл сәт Карлсен үшін психологиялық тұрғыдан ауыр соққы болды – ол эмоциясын жасыра алмады.
Бұл – турнирдің алтыншы турындағы кездесу болды. Еске сала кетейік, бірінші турда дәл осы екі шахматшы кездесіп Карлсен жеңіске жеткен. Алайда бұл жолы Гукеш қарымта қайырды.
Жаңартылған Халықаралық шахмат федерациясының (ФИДЕ) рейтингінде Магнус Карлсен әлі де көш бастап тұр (2837 ұпай). Ал 18 жастағы Гукеш Доммараджу 2776 ұпаймен үздік бестікке кіріп отыр. Ол қазір әлем чемпионы мәртебесін иеленіп, Карлсеннің басты бәсекелесіне айналған.
