Ақтөбе облысы футбол инфрақұрылымын дамытудың жаңа кезеңіне қадам басты. Қазақстан футбол федерациясы (ҚФФ) өңірде заманауи стадион салынатынын мәлімдеді.
Қазақстан футбол федерациясының кәсіби клубтар арасындағы жарыстарды өткізу дирекциясының жетекшісі Бақытжан Пазылқайыр жұмыс сапарымен Ақтөбе облысына келді. Сапар барысында ол облыс әкімі Асхат Шахаровпен кездесті.
Қос тарап өңірдегі футбол инфрақұрылымын дамыту, жасөспірімдерге қолдау көрсету және алдағы жоспарлар жөнінде пікір алмасты.
Бақытжан Пазылқайырдың айтуынша, сапар Қазақстан футбол федерациясы президенті Марат Омаровтың тікелей тапсырмасымен ұйымдастырылған.
"Ақтөбе тек әлеуметтік емес, спорттық бастамаларға да ерекше назар аударатын өңір. Мұнда шынайы жанкүйерлік атмосфера мен спорттық рух қалыптасқан. Кездесуде басты тақырып – халықаралық стандарттарға сай футбол стадионының құрылысы болды. Ақтөбе — мұндай арена салынатын алғашқы облыстардың бірі болмақ. Бұл – Мемлекет басшысының спорт инфрақұрылымын дамыту жөніндегі тапсырмасының нақты жүзеге асуы", – деді Пазылқайыр.
ҚФФ өкілі сонымен қатар стадион құрылысының әр кезеңінде федерация тарапынан кеңестік қолдау көрсетілетінін жеткізді.
Сапар аясында "Алаң" жобасының жүзеге асуы да талқыланды. Жоба аясында Есет батыр атындағы олимпиадалық резервтегі облыстық мектеп-интернат стадионында жасанды жабынды жаңартылып, ауылдық жерлерден келген дарынды балаларға арналған арнайы футбол сыныптары ашылмақ.
Бақытжан Пазылқайыр бұған дейін Қызылорда, Қарағанды, Маңғыстау өңірлеріне барып, жергілікті футболдың даму барысымен танысқан.
