Шымкентте есірткі заттарын заңсыз сақтап, тасымалдаған 33 жастағы камерундық футболшы Мбала Бомба Роджер 8 жылға бас бостандығынан айырылды.
Қылмыстық істер жөніндегі мамандандырылған ауданаралық сот шетелдік азаматты ҚР Қылмыстық кодексінің 297-бабы 3-бөлімі, 1-тармағы бойынша кінәлі деп танып, орташа қауіпсіздіктегі колонияда 8 жыл жазасын өтеуге үкім шығарды.
“Мбала Бомба Роджерге қатысты қылмыстық іс бойынша сот айыптау үкімін шығарды. Ол синтетикалық есірткіні заңсыз тасымалдап, таратпақ болғаны үшін жауапкершілікке тартылды”, – делінген ресми хабарламада.
Футболшы 2025 жылдың наурыз айында Шымкентте ұсталған. Тергеу барысында оның үстінен 1,5 кг синтетикалық есірткі табылған.
Істің материалдарына сәйкес, Роджер есірткі заттарын Telegram мессенджері арқылы таратуға қатысы болуы мүмкін деген күдікке ілінген. Дегенмен ол бұл айыптарды мойындамайды.
Мбала Бомба Роджер сотта өз сөзінде былай деді:
“Мен тек футболшы болдым. Бізді әр матчтан кейін допингке тексеретін. Ешқашан заң бұзған емеспін. Бұл жағдай қалай болғанын өзім де түсінбеймін. Мен жаман адам емеспін”, – дейді ол.
Сондай-ақ, футболшы Қазақстанда виза мерзімі өтіп кеткен күйде жүргенін мойындаған.
