Кезекті қазақстандық спортшы Дана Уайттың әйгілі Power Slap лигасымен келісімшартқа қол қойды. Енді ел намысын Данияр Шахаров қорғайды.
Оның алғашқы қарсыласы – нигериялық Адеринола. Бұл жекпе-жек 24 қазанда Абу-Дабиде орналасқан Space 42 аренасында өтеді және Abu Dhabi Showdown Week апталығының басты оқиғаларының бірі болмақ. Айта кетсек, бұл турнир UFC 321 шоуының қарсаңында ұйымдастырылады.
Power Slap 16 көрермендерге қызықты кард ұсынбақ:
Басты жекпе-жекте жартылай ауыр салмақ чемпионы Рон Бата белбеуін Алан Клинбейлге қарсы қорғайды.
Сонымен қатар суперауыр салмақта әйгілі блогер әрі спортшы Василий Камоцкий Макини Мануға қарсы шығады.
Айта кетейік, бұған дейін тағы бір қазақстандық спортшы Зәкір Найманбаев жаңа қарсыласымен кездесетіні хабарланған. Ол келесі айқаста Power Slap ауыр салмақ дивизионының №1 рейтинг иегері, америкалық Дориан Переспен күш сынасады.
Бұл кездесу Power Slap 17: Blackburn vs. Young 2 турнирінің екінші басты жекпе-жегі ретінде өтеді. Шара 31 қазанда Эр-Риядтағы Mohammed Abdo Arena алаңында ұйымдастырылады.
Зәкір Найманбаев үшін бұл мансабындағы ең маңызды айқастардың бірі болмақ. Егер ол жеңіске жетсе – қазақстандық спортшы Power Slap лигасында титулдық жекпе-жекке жолдама алады.
