Алматыда 26 жастағы жаттықтырушы қайтыс болды. Ол ауыр халде ауруханаға емес, алдымен айықтырғышқа (вытрезвитель) жеткізілгенінен кейін тіл қатпай кетті.
Отбасының айтуынша, жаттықтырушы 1 қараша күні шәкірттерімен бірге Алматыға жарысқа келген. Келесі күні қаланың бір дәмханасына тамақтану үшін кірген. Бейнебақылау камераларында оның тапсырыс беріп, үстелге отырған сәті түсіп қалған, деп жазады Tengrinews.kz.
Анасының сөзінше, дәмханада кенеттен жағдайы нашарлап құса бастаған, есінен таныған.
Әйелдің айтуынша, дәмхана қызметкерлері «жедел жәрдем» шақырудың орнына полиция шақырған.
Марқұмның туыстарының сөзіне қарағанда оқиға орнына келген полицейлер де дәрігерлерді шақырмаған, ал жаттықтырушыны «мас адам» ретінде айықтырғышқа алып кеткен болуы мүмкін.
3 қараша күні марқұмның анасы ұлына хабарласуға тырысқан. Бірақ ол телефон тұтқасын көтермеген. Оның орнына телефонға өзін учаскелік инспектор ретінде таныстырған ер адам жауап берген: «Телефонды таптым, бәрі жақсы» деп сендірген. Тек біраз уақыттан кейін ұлының айықтырғышта жатқанын айтқан, – дейді анасы.
Осыдан кейін отбасы наркологиялық орталықтарға хабарласа бастаған.
Анасы баласының ішімдік ішпейтінін, шекпейтінін және ешқандай тыйым салынған заттар қолданбайтынын айтады. Сол күні туыстарының бірі жаттықтырушыны алып кетіп, ауруханаға жеткізген.
Анасының сөзінше, ауруханада дәрігерлер ұлының миына қан құйылғанын анықтаған. Оған шұғыл операция жасаған. Бірақ ол операциядан кейін комаға түскен. Сегіз күннен соң көз жұмған.
Отбасы егер алғашқы минуттарда медициналық көмек дер кезінде көрсетілсе, оны аман алып қалуға мүмкіндік болар еді деп санайды.
Бұл оқиға қоғамда үлкен резонанс тудырды. Полиция тарапынан қызметтік тексеріс басталып, оқиғаға қатысы бар қызметкерлердің әрекеттері зерттеліп жатқаны хабарланды.
Марқұмның жақындары Алматыда бокс жаттықтырушысымен болған жағдайдың толық мән-жайы ашылып, кінәлілер жауапкершілікке тартылғанын қалайды.
