Қазақстан құрамасының бас бапкері қызметіне бразилиялық Рикардо Камара Собрал "Какау" ресми түрде кірісті.
ҚФҚ-ның ресми Instagram парақшасында: "Какау — Қазақстан футзал құрамасының жаңа бас бапкері" деп хабарланған.
54 жастағы маман отандық футзал жанкүйерлеріне жақсы таныс. Ол бұған дейін Қазақстан құрамасын 2013–2018 жылдары басқарған.
Сол кезеңдегі ең ірі жетістіктің бірі — Еуро-2016 додасында ұлттық команданың қола жүлде алуы. Бұл Қазақстан футзалы үшін тарихи нәтиже ретінде бағаланады.
Какау клубтық деңгейде де Қазақстанда табысты жұмыс істеді. Ол Алматының "Қайрат" командасын баптап, 2013 және 2015 жылдары ұжыммен бірге УЕФА кубогын ұтып алған. Сондай-ақ оның жетекшілігімен "Қайрат" бірнеше мәрте Қазақстан чемпионаты мен Қазақстан кубогын жеңген.
Какаудың орнына 2018 жылы тағы бір бразилиялық маман — Паулу Рикарду Фигейра Силва (Кака) келген еді. Ол Какау қызметтен кеткеннен кейін ұлттық құрама тізгінін ұстады.
Айта кетейік, 2025 жылы Қазақстан футзалы үшін ең ауыр нәтиже — ұлттық құраманың Еуро-2026 (Еуропа чемпионаты) турниріне соңғы 10 жылда алғаш рет іріктеле алмауы болды. Бұл жағдай қоғамда үлкен талқылау тудырған.
