Паралимпиадашылар мен олардың бапкерлерін Қарағанды облысының әкімі құттықтады.
Париждегі XVII Жазғы Паралимпиада ойындарының жүлдегерлеріне бір бөлмелі пәтерлердің кілттері мен 7 миллион теңгеге ақшалай сертификаттар табысталды. Ал жаттықтырушылар 3 миллион теңге көлемінде ақшалай сертификаттармен марапатталды.
Кездесуде өңір басшысы Ермағанбет Бөлекпаев жаттықтырушылардың ерен еңбегін, ал спортшылардың жеңіске деген үлкен ұмтылысты мен жанқиярлығын атап өтті.
Айта кетейік, қарағандылық спортшылар Дастан Мұқашбеков пен Даяна Федосова жазғы паралимпиада ойындарында қола медаль иеленген еді. Дастан оқ атудан үшінші орын алып, Азия рекордын жаңартса, Даяна парадзюдода J2 санатында жүлделі орыннан көріне білді.
