Белгілі қазақстандық шахматшы әрі халықаралық гроссмейстер Жансая Әбдумәлік өз Instagram парақшасында жанкүйерлерінің сұрақтарына жауап берді.
Көпшілікті толғандырған басты сұрақ — оның неге шахматтан кетіп, спорттан уақытша алшақтағаны болды.
25 жастағы гроссмейстер бұл сұраққа қысқа да нұсқа жауап берді:
«Өйткені мен басқа маңызды істермен айналыстым», – деп жазды Жансая, аяғы ауыр кезінде түскен суретін бөлісіп.
Спортшы бұл жазбасымен өзінің өміріндегі жаңа кезеңге қадам басқанын аңғартты.
Жансая шахматқа қайта оралу тақырыбына да тоқталды.
«Шахмат – менің өмірімнің мәңгілік бөлігі. Бірақ қазір мен басқа кезеңдемін: отбасы, аналық, ішкі жаңғыру.
Қашан қайта оралғым келсе – міндетті түрде оралам. Ал егер қаламасам, онда басқа да маңызды дүниелермен айналысамын», – деп бөлісті спортшы.
Жанкүйерлердің бірі Жансаядан: «Балаңызға қандай есім қойдыңыз?» деп сұрады. Оған жауап ретінде шахматшы «қырқынан шығару» рәсімінде қолданылған ыдыстың суретін жариялады.
Ондағы жазуға қарағанда, гроссмейстер ұл баланы дүниеге әкелген. Сәбидің есімі — Аңсар.
