Австралияның Траралгон қаласында өтіп жатқан ITF J300 санатындағы беделді юниорлық турнирде Заңғар Нұрланұлы тарихи нәтижеге жетті.
Қазақстандық теннисші турнирдің үшінші кезеңінде АҚШ өкілі Гэвин Гудты (ITF Juniors рейтингінде 21-орын) екі сетте тізе бүктірді. Есеп: 7:6 (7:5), 6:1
Алғашқы сет тартысты тай-брейкке дейін созылса, екінші сетте Заңғар ойын тізгінін толық өз қолына алды.
Бұл жеңіс тарихи көрсеткіш ретінде тіркелді: Заңғар Нұрланұлы — Траралгондағы J300 турнирінің жекелей сынында ширек финалға жеткен Қазақстаннан шыққан алғашқы юниор.
Енді Заңғарға жартылай финалға шығу үшін әлемдік юниорлық турдың көшбасшыларының бірі — Бразилия теннисшісі Луиш Гуту Мигелмен кездесу керек. Қарсыласы ITF Juniors рейтингінде 5-орында тұр.
Матч 19 қаңтарға жоспарланған.
Жас қазақстандық бұған дейін де әлемдік рейтингте айтарлықтай серпіліс жасап, ITF юниорлар рейтингісінде 12-орынға дейін көтерілгені хабарланған.
Ал ең жақын ірі дода — юниорлық Australian Open турнирінде Зангар 10-нөмірлі болып тіркеліп, негізгі тордан бірден өнер көрсетеді. Жарыс 24 қаңтар мен 1 ақпан аралығында Сиднейде өтеді.
