Рыбакина Australian Open-2026 турнирінде камбэктен кейін қарсыласын ойсырата жеңді

Кездесудің басында фаворит саналған Рыбакина қиын жағдайға тап болды. Грачева брейк жасап, есепте 3:1 алға шықты. Алайда Елена дәл сол сәтте ойын тізгінін қайта қолға алып, алғашқы партияны 7:5 есебімен жұлып әкетті. Екінші сетте қазақстандық теннисші әлдеқайда сенімді ойнап, 6:2 нәтижесімен нүкте қойды. Матч 1 сағат 17 минутқа созылды.

Осы жеңістен кейін Рыбакина турнирдің 1/16 финалына өтті. Келесі кезеңде оған Чехияның жас теннисшісі Тереза Валентова (WTA №54) қарсылаc болады.

Биылғы маусымның алғашқы «Үлкен дулыға» турнирі Мельбурнда 18 қаңтар мен 1 ақпан аралығында өтеді. Жүлде қоры рекордтық деңгейге көтеріліп, жалпы сыйақы 111,5 млн австралиялық доллар болды, ал әйелдер және ерлер арасындағы жекелей сында чемпион 4,15 млн алады.