Қазақстандық теннисші Елена Рыбакина (WTA рейтингінде 7-орын) Индиан-Уэллс (АҚШ) турнирінде кезекті жеңісіне жетті.
Үшінші айналымда Рыбакина Ұлыбритания өкілі Кэти Бултермен (WTA 38-орын) кездесіп, екі сетте айқын басымдықпен жеңіске жетті – 6:0, 7:5. Бұл жеңіс арқылы Елена жарыстың 1/8 финалына шықты. Онда ол ресейлік вундеркинд Мирра Андреевамен ракетка түйістіреді.
Турнирдің алғашқы кездесуінде Қазақстанның бірінші ракеткасы Нидерланд өкілі Сюзан Ламенсті (WTA 64-орын) 6:3, 6:3 есебімен жеңген болатын.
Биылғы Индиан-Уэллс турнирінің жүлде қоры 8 963 700 АҚШ долларына тең. Турнир жеңімпазы 1 124 380 доллар сыйақыға ие болып, сонымен қатар WTA рейтингінде 1000 ұпай жинайды.
