Қазақстандық кәсіпқой боксшы Балауса Муздыман әлем чемпиондығы атағына таласуға дайындалып жатыр. Бұл туралы оның менеджері Уля Мұсаханова мәлімдеді.
Мұсаханованың айтуынша, Балауса жақын күндері демалыстан оралып, жекпе-жекке дайындықты бір апта ішінде бастайды. Егер қарсылас және промоушнмен келісімге келу сәтті жүзеге асса, жекпе-жек 2025 жылдың қараша немесе желтоқсан айында өтуі мүмкін.
“Бәрі титулдың бос болуына не басқа боксшыда болуына байланысты. Кейде титулдық жекпе-жек алдын ала жоспарланып қойылады, бірақ ресми түрде жарияланбаған болуы мүмкін. Сондықтан уақыт пен қарсылас әлі нақтыланып жатыр”, – дейді менеджер.
Балауса Муздиманның чемпиондық айқасқа жақындауы кездейсоқ емес. Ол жуырда Астанада өткен жекпе-жекте филиппиндік Мария Тереза Пинилиді төрешілердің бір ауызды шешімімен жеңді. Бұл жеңіс оның кәсіпқой рейтингін айтарлықтай күшейтіп, жаңа деңгейге шығарды.
