Карағандыда KCF2 турнирі аясында өткен жекпе-жек қазақстандық жанкүйерлерге ұмытылмас әсер қалдырды.
2025 жылдың 10 сәуірінде Карағандыда өткен KCF2 турнирінде K-1 ережесі бойынша әсерлі жекпе-жек өтті. 66 келі салмақ дәрежесінде қазақстандық спортшы Сергей Каталов өзбекстандық Абдулазиз Адхамовпен қолғап түйістірді. Каталов үш раунд бойы рингте толық басымдық танытып, қарсыласына еш мүмкіндік қалдырмады.
Жекпе-жектің соңғы раундында Каталов екі нокдаун жасап, өзінің айқын басымдығын дәлелдеді. Осылайша, төрешілер бірауыздан жеңісті қазақстандық спортшыға берді.
Абдулазиз Адхамов – кикбоксингтен Азия чемпионатының күміс жүлдегері. Өзбекстандық спортшының тәжірибесі мен титулдарына қарамастан, бұл кеште ол Каталовтың қысымына төтеп бере алмады.
Сергей Каталов – әуесқойлар арасындағы кикбоксингтен Азия чемпионы және Әлем кубогының иегері. Бұл жеңісі оның спорттық мансабындағы кезекті жарқын жетістікке айналды.
