Ресейдің Хабаровск қаласында өтіп жатқан Константин Коротковты еске алуға арналған халықаралық бокстан турнирде қыздар арасындағы жартылай финалдық жекпе-жектер өз мәресіне жетті. Қазақстандық спортшылар кезекті мәрте жоғары нәтижелер көрсетіп, финалға шықты.
60 келіге дейінгі салмақта Қазақстан әйелдер құрамасының көшбасшыларының бірі, Азия чемпионы (2019), Қазақстанның бірнеше дүркін чемпионы Римма Волосенко өзбекстандық Рашида Тагированы төрешілердің бірауызды шешімімен (5:0) ойсырата жеңіп, финалға жолдама алды. Жекпе-жекте Римма қарсыласынан әлдеқайда жоғары деңгейде екенін дәлелдеді.
Тағы бір жартылай финалдық кездесуде 66 келіге дейінгі салмақта екі қазақстандық боксшы — Аружан Жаңабаева мен Ұлдана Таубай өзара күш сынасты. Бұл — шын мәнінде ішкі бәсекенің көрінісі болды.
Күрделі әрі тартысты өткен жекпе-жекте Ұлдана Таубай 4:1 есебімен жеңіске жетіп, турнирдің финалына шықты. Ал Аружан Жаңабаева турнирді қола жүлдемен аяқтады.
