Хабаровск қаласында өтіп жатқан Константин Коротковты еске алуға арналған халықаралық турнирдің жартылай финалында Қазақстанның тәжірибелі боксшысы, әлем және Азия чемпионы Теміртас Жүсіпов жекпе-жегін күтпеген нәтижемен аяқтады.
48 келіге дейінгі салмақта сынға түскен Жүсіпов жартылай финалда КХДР өкілі Тэ Ганмен жұдырықтасып, белсенді, қарқынды және айырбас соққыларға толы кездесуде төрешілердің бірауызды шешімімен жеңіліп қалды.
Осылайша, Тэ Ган финалда 19 сәуірде Ресейлік Володя Мнацаканянмен кездеседі.
Жартылай финалға дейін Теміртас Жүсіпов мықты спорттық формасын көрсетіп, ресейлік Михаил Прокопьевті 5:0 есебімен айқын басымдықпен жеңіп шыққан болатын. Бұл кездесуде Жүсіпов өзінің тәжірибесін толықтай көрсетіп, жанкүйерлердің үмітін арттырған еді.
