Канелоның қарсыласы Алматыда жекпе-жек өткізеді

Алматыда All Stars Boxing бокс кеші өтеді

Алматыда 6 маусым күні халықаралық деңгейдегі All Stars Boxing сериясы аясында кәсіби бокс кеші өтеді. Бұл кеште рингке отандық былғары қолғап шеберлерімен қатар шетелдік танымал спортшылар да шығады.

Кештің басты жекпе-жектерінің бірі — жартылай ауыр салмақтағы түркиялық Авни Йылдырым мен ресейлік Игорь Михалкин арасындағы кездесу болмақ.

Авни Йылдырым — Канелоға қарсы шыққан

Йылдырым — тәжірибелі боксшы, оның кәсіпқой рингтегі көрсеткіші: 26 жеңіс, 5 жеңіліс, 15 нокаут. Соңғы рет ол 2023 жылдың 9 қарашасында Дубайда жұдырықтасып, ресейлік Сергей Гороховты (15-11-2, 10 КО) үшінші раундта техникалық нокаутпен жеңді.

Ең атаулы жекпе-жектерінің бірі — 2021 жылы әлемге әйгілі мексикалық чемпион Сауль «Канело» Альвареспен болған кездесуі. Бұл айқаста WBC белбеуі сарапқа салынған еді, алайда Йылдырым сол жолы жеңіліп қалды.

Игорь Михалкин — IBO нұсқасы бойынша бұрынғы әлем чемпионы

Михалкин 2022 жылдың қарашасынан бері рингке шықпаған. Оның соңғы қарсыласы қырғызстандық Дилмұрод Сатыбалдиев (15-5, 6 КО) болған еді — бұл жекпе-жекте ресейлік боксшы төрешілердің бір ауыздан шешімімен жеңіске жетті.

Игорь өзінің мансабында IBO тұжырымы бойынша жартылай ауыр салмақтағы әлем чемпионы атағын иеленген. Жалпы көрсеткіші: 25 жеңіс, 3 жеңіліс, 11 нокаут.

Алматыдағы жекпе-жек

Екі қарсылас та — әлемдік аренада танымал, тәжірибесі мол боксшылар. Бұл айқас көрермендер үшін нағыз бокс шоуына айналуы мүмкін. Алматыдағы All Stars Boxing кеші көрермендерге ұмытылмас әсер сыйлайды деп күтілуде.