Қазақстандық ММА спортшысы Фаниль Рафиков (20-6) бұрынғы UFC файтері Дамир Ысмағұловты (26-3) ашық жекпе-жекке шақырды. Оның мәлімдемесі әлеуметтік желілерде қызу талқыланып, отандық спорт әлемінде үлкен резонанс тудырды.
"Кеше Дамирдің жекпе-жегін қарап шықтым. Не айтуға болады? Дамир, бразилиялық зейнеткерлерді ұрып, олардың зейнетақы қорын толтыруды доғар. Біз – ең мықты екі жеңіл салмақтағы файтермыз. Сондықтан бұл кездесуді үлкен шоуға айналдырып, көрермендерге қызықты контент ұсынуға болады. Ал 41 жастағы бразилиялықты жеңу екінің бірінің қолынан келеді. Бұл мәселені шынайы ММА октагонында шешу керек", – деді Рафиков өз Instagram парақшасында.
Ол сондай-ақ Мариф Пираевпен болатын келесі кездесуінен кейін қысқа үзіліс алып, күзде Ысмағұловпен жұдырықтасуға дайын екенін жеткізді.
Айта кетейік, 27 мамыр күні Астанада өткен Alash Pride 108 турнирінде Дамир Ысмағұлов бразилиялық файтер Алан Патрикті (15-5) екінші раундта нокаутпен жеңді. Бұл оның UFC-ден кейінгі алғашқы жарқын жеңісі болды.
