2024 жылғы Олимпиада ойындарында Өзбекстанның атынан өнер көрсеткен дзюдошы Диёра Келдиёрова алтын медаль иеленіп, ел тарихында жаңа парақ ашты. Бірақ атақты жеңіспен қатар, спортшы әлеуметтік желілерде хейтерлердің ауыр шабуылына ұшырады.
Бұл туралы ол Qstar group YouTube арнасына берген сұхбатында айтты.
Диёра Олимпиаданың 1/16 финалында нағыз сенсация жасады. Ол 2020 жылғы Токио Олимпиадасының чемпионы, жапониялық Абэ Утэні иппонмен (10:1) таза жеңіп шықты. Ал финалда Косоводан келген Дистрию Красничиді ұтып, Ташкентке алтын медальмен оралды.
Дегенмен күткен қуаныш ұзаққа созылмады. Әлеуметтік желілерде оның жеңісіне күмәнмен қарағандар көбейді.
“Маған: "Бұл жай ғана сәттілік" немесе "Келесі турнирде жеңілесің" деп жазды. Олар менің әлем чемпионатының күміс жүлдегері, Азия ойындарының чемпионы екенімді елемейді. "Сен Абэ Утэні жеңе алмайсың", "Бұл жарысты ала алмайсың" деді. Бірақ мен дәлелдедім. Олимпиадада жеңдім. Алайда олар тоқтаған жоқ — енді келесі жарыста жеңілесің дейді”, – деді спортшы ашық сұхбатында.
Диёра Келдиёрова — жазғы Олимпиада ойындарында алтын медаль алған Өзбекстандағы алғашқы әйел спортшы. Ол тек жеңіспен емес, елдің спорт тарихына қосқан үлесімен де ерекшеленеді. 2024 жылғы Олимпиададағы алғашқы өзбек медалі де осы спортшының еншісінде.
Келдиёрова 1998 жылы 13 шілдеде Өзбекстанның Жұма қаласында дүниеге келген. Алты жасында әжесінің бастамасымен спорт мектебіне барған. Бастапқыда залға тек әжесінің көңілін қимай барып жүрген қыз бала уақыт өте дзюдоға шын беріліп, жаттығуға құштарлана кіріскен.
Ол Өзбекстанның Мемлекеттік дене шынықтыру және спорт университетін бітірген.
