Бокстан Thailand Open-2025 халықаралық турнирінде Қытай құрамасы сапындағы этникалық қазақ боксшы Тоқтарбек Таңатқан финалға шықты.
80 келіге дейінгі салмақ дәрежесінде өткен жекпе-жекте Таңатхан өзбекстандық Самандар Джалоловпен қолғап түйістірді. Алғашқы раундта төрешілер Джалоловтың басымдығын мойындап, 5:0 есебін тіркеді. Алайда бұл Таңатханды тоқтата алмады. Екінші және үшінші раундтарда ол қарсыласын екі рет нокдаунға жіберіп, кездесудің бағытын толықтай өзгертті.
Нәтижесінде барлық төрешінің бірауызды шешімімен жеңіске жетіп, турнир финалына жолдама алды.
Айта кетейік, Тоқтарбек Таңатқан 2022 жылы Ханчжоуда өткен Азия ойындарының чемпионы және 2023 жылғы әлем чемпионатының күміс жүлдегері. Оның бұл жеңісі алдағы Олимпиада ойындары қарсаңында басты қарсыластарға берілген нақты белгі.
"Тоқтарбек бұл жекпе-жекте жігер мен төзімділіктің тамаша үлгісін көрсетті. Қарсыласынан бірінші раундта ұтылғанына қарамастан, керемет қарқынмен қайтарып, жеңіске жетті", – деп бағалады жаттықтырушылар штабы.
