Бокстан Thailand Open-2025 халықаралық турнирінің жартылай финалында Қазақстан мен Өзбекстан жолықты. Бұл жолғы "бокстық эль-классико" 85 келіге дейінгі салмақ дәрежесінде өтті.
Рингте Қазақстан құрамасының өкілі Бекзат Таңатар мен өзбек боксшысы Нусратбек Тохиров қолғап түйістірді. Үш раундқа созылған тартысты кездесудің қорытындысы төрешілердің бөлінген шешімімен (4:1) өзбекстандық спортшының пайдасына шешілді.
Соның нәтижесінде Тохиров финалға жолдама алып, алтын медаль үшін күреседі. Ал Бекзат Таңатар Thailand Open турнирін қола жүлдемен қорытындылады.
"Кездесу өте шиеленісті өтті. Таңатар бар күшін салды, алайда төрешілер шешімі қарсыластың пайдасына бұрылды. Бұл – біздің спортшы үшін үлкен тәжірибе", – деп жазды Sports.kz порталы.
Ерлер мен әйелдер арасындағы финалдық жекпе-жектер 1 маусымда өтеді. Қазақстан құрамасынан жарыстың шешуші кезеңіне жеткен бірнеше боксшы бар, олар алтын медаль үшін рингке шығуға дайын.
