Қазақстан бокс федерациясының бас хатшысы Мерей Ақшалов 2016 жылғы Олимпиада чемпионы Данияр Елеусіновтің кәсіби мансабына алаңдаушылық білдірді. Бұл туралы ол "Aqyrys Seitqazy" YouTube арнасына берген сұхбатында айтты.
"Данияр әуесқой бокста барлық белесті бағындырды. Бірақ кәсіби мансабында қиындықтар басталды. Бұған дейін бір промоутермен жұмыс істеді, кейін келісімшарт аяқталды. Қазір жақсы промоутер таппай, көп уақыт жоғалтты. Профибокста уақыт сенің жауың. Қазір ол тоқтап қалды – жылына бір-ақ жекпе-жек өткізуде," – деді Мерей Ақшалов.
Данияр Елеусінов – Қазақстанның соңғы Олимпиада чемпионы. Ол жақында UFC президенті Дана Уайт пен саудиялық ықпалды инвестор Турки әл-Шейх негізін қалаған жаңа кәсіби бокс лигасымен келісімшартқа отырды.
Алайда қазақстандық боксшының жаңа жобадағы дебюті әлі күнге дейін жарияланбады.
Елеусіновтің соңғы кездесуі 2024 жылдың қыркүйек айында Алматыда өтті. Онда ол филиппиндік Джо Нойнаяны техникалық нокаутпен сенімді түрде жеңді. Бірақ тұрақты жекпе-жектердің болмауы және промоутердің болмауы оның мансаптық дамуына кедергі келтіруде, дейді мамандар.
