Жастар арасындағы әлем чемпионы Сабыржан Ақхалықов Нидерландының Эйндховен қаласында өтіп жатқан Eindhoven Box Cup-2025 халықаралық турниріндегі алғашқы жекпе-жегін сәтті өткізді.
Аса тартысты өткен алғашқы айналымда Ақхалықов 75 келіге дейінгі салмақта Уэльс боксшысы Орландо Холлей-Сатомимен жұдырықтасты. Кездесу қорытындысы бойынша қазақстандық былғары қолғап шебері барлық төрешінің бірауыздан шығарған шешімімен – 5:0 есебімен жеңіске жетті.
Бұл жекпе-жек Ақхалықовтың мықты формада екенін дәлелдеді және оның турнирдегі басты фавориттердің бірі екенін көрсетіп отыр.
Сабыржан келесі кезеңде ринг иесі, яғни Нидерланд құрамасының өкілі Кипрус Сайруспен кездеседі.
Сабыржан Ақхалықов — 2021 жылғы жастар арасындағы әлем және 2024 жылғы Азия чемпионы. Сонымен қатар 2025 жылы Болгарияда өткен "Странджа кубогында" ересектер арасында алтын медаль иегері. 2021 жылы кәсіпқой бокста да күш сынасты. Қарағанды мен Астанада екі жекпе-жек өткізіп, екеуінде де техникалық нокаутпен жеңіске жеткен.
